दाङ १३ कार्तिक । स्थानीयस्तरमा क्रिकेट खेलको प्रवर्द्धन गर्दै युवा खेलाडीको प्रतिभा उजागर गर्ने उद्देश्यले दाङको शान्तिनगर गाउँपालिकामा प्रथम सिटी युथ सुपर सिक्स क्रिकेट प्रतियोगिता आयोजना हुने भएको छ।
शान्तिनगरस्थित धनौरी स्कुलको खेलमैदानमा कात्तिक १४ र १५ गते प्रतियोगिता सञ्चालन हुन लागेको हो। प्रतियोगितामार्फत स्थानीय युवामा क्रिकेटप्रतिको आकर्षण बढाउनुका साथै नयाँ खेल प्रतिभालाई प्रतिस्पर्धाको अवसर प्रदान गर्ने लक्ष्य राखिएको छ। प्रतियोगितामा उत्कृष्ट प्रदर्शन गर्ने टोलीलाई आकर्षक नगद पुरस्कारको व्यवस्था गरिएको छ। प्रतियोगिताको विजेता टोलीले २० हजार रुपैयाँ र उपविजेता टोलीले १० हजार रुपैयाँ नगद पुरस्कार प्राप्त गर्नेछन्। प्रतियोगितामा सहभागी हुन इच्छुक टोलीले तीन हजार रुपैयाँ दर्ता शुल्क बुझाउनुपर्नेछ।
छोटो र रोमाञ्चक प्रारूपमा सञ्चालन हुने प्रतियोगितामा प्रत्येक टोलीबाट सात जना खेलाडी सहभागी हुन पाउनेछन् भने खेल छ ओभरको हुनेछ। सीमित ओभरमा खेलाडीले देखाउने कौशल, रणनीति र उत्कृष्ट प्रदर्शनले प्रतियोगितालाई थप प्रतिस्पर्धात्मक बनाउने अपेक्षा गरिएको छ। स्थानीयस्तरमा क्रिकेटको आधार बलियो बनाउने, उदीयमान खेलाडीलाई आफ्नो क्षमता प्रदर्शन गर्ने अवसर दिने तथा युवाबीच आपसी सद्भाव, अनुशासन र खेलभावना विकास गर्ने प्रतियोगिताको मुख्य उद्देश्य रहेको छ।
प्रतियोगितालाई सफल बनाउन स्थानीय युवा, खेलाडी तथा क्रिकेटप्रेमीहरूलाई सहभागिता जनाउन आयोजकले आग्रह गरेको छ। प्रतियोगिताले शान्तिनगर क्षेत्रमा क्रिकेट गतिविधि विस्तार गर्न र स्थानीय खेलकुदको विकासमा योगदान पुर्याउने विश्वास गरिएको छ।
टिप्पणी तथा प्रतिक्रिया
यस समाचारबारे आफ्नो विचार तथा प्रतिक्रिया राख्नुहोस्।