बाँके, १८ असार । पश्चिम नेपालको केन्द्र तथा भारतसँग सीमाना गाँसिएको बाँके जिल्ला डेंगु रोगको उच्च जोखिममा देखिएको छ । खुला सीमाना र डेंगुबारे जिल्लामा खासै सचेतना नफैलाइएका कारण यो जिल्ला डेंगुको उच्च जोखिममा रहेको हो । स्वास्थ्य कार्यालय बाँकेका अनुसार जिल्लाका हरेक पालिकामा डेंगुको सङ्क्रमण देखिएकाले पनि यसलाई समयमै नियन्त्रण गर्न नसकिए यो रोग झनै फैलिने आशङ्का बढ्दै गएको छ । बाँकेमा चालु आर्थिक वर्षको हालसम्म ४०५ जना डेंगुका सङ्क्रमित भेटिएकोले यसको जोखिम बढ्दै गएको स्वास्थ्य कार्यालय बाँकेका डेंगु रोग फोकल पर्सन दुर्गा गौतमले बताउनुभयो । उहाँका अनुसार जिल्लाका आठ वटै स्थानीय तहहरू मध्ये हाल नेपालगन्ज उपमहानगरपालिकामा ४५,कोहलपुर नगरपालिकामा २४, राप्ती सोनारी गाउँपालिकामा पाँच, बैजनाथमा नौ, खजुरामा चार, जानकीमा पाँच, र डुडुवा गाउँपालिकामा छ जना डेंगुका बिरामी रहेका छन् । जिल्लामा डेंगु सङ्क्रमणको जोखिम बढ्ने समय नजिक आएको र यसको नियन्त्रणमा ध्यान नदिने हो भने अवस्था अति नै खराब पनि हुनसक्ने डेंगु रोग फोकल पर्सन गौतमको भनाइ छ ।
उहाँले यो रोग नियन्त्रणका लागि सीमानामा पनि निगरानी बढाउनु आवश्यक रहेको बताउनुभयो । स्वास्थ्य कार्यालय बाँकेका प्रमुख अङ्गद बहादुर शाहीका अनुसार डेंगुको जोखिम मुख्यगरी जुलाईदेखि नोभेम्बरसम्म हुने गरेकाले अब नियन्त्रण अभियानलाई तीव्र पार्नुपर्नेमा जोड दिनुभयो ।।
टिप्पणी तथा प्रतिक्रिया
यस समाचारबारे आफ्नो विचार तथा प्रतिक्रिया राख्नुहोस्।