दाङ, १३ कात्तिक । भारतको उत्तराखण्डस्थित प्रसिद्ध धार्मिक तीर्थस्थल बद्रीनाथ धामबाट देहरादुनतर्फ उडेको हेलिकप्टर दुर्घटनामा परेको छ। दुर्घटनापछि हेलिकप्टरका पाइलटसँग सम्पर्क विच्छेद भएको छ भने सुरक्षाकर्मीले ड्रोनको सहायताबाट खोजी कार्य तीव्र पारेका छन्।
प्रारम्भिक विवरणअनुसार शुक्रबार बद्रीनाथबाट देहरादुनको सहस्रधाराका लागि उडेको हेलिकप्टर चमोली जिल्ला क्षेत्रमा दुर्घटनामा परेको हो। हेलिकप्टरमा चालक दलका सदस्यबाहेक ६ जना यात्रु सवार रहेको बताइएको छ। घटनाको जानकारी पाएलगत्तै उत्तराखण्ड नागरिक उड्डयन विकास प्राधिकरण र प्रहरीको टोली खोजी तथा उद्धार कार्यमा परिचालन भएको छ। उद्धार टोलीले पाइलटसँग रेडियो तथा अन्य सञ्चार माध्यमबाट सम्पर्क स्थापित गर्ने प्रयास गरे पनि हालसम्म सम्पर्क हुन सकेको छैन।
दुर्घटनाग्रस्त हेलिकप्टरको अवस्था र त्यसमा सवार यात्रुहरूको अवस्थाबारे विस्तृत विवरण प्राप्त हुन सकेको छैन। घटनास्थल आसपासको मौसम प्रतिकूल रहेकाले खोजी तथा उद्धार कार्यमा कठिनाइ भइरहेको जनाइएको छ। खराब मौसमका कारण हवाई तथा स्थलगत खोजी प्रभावित भएपछि प्रशासनले ड्रोनको प्रयोग गरी हेलिकप्टरको सम्भावित अवस्थिति पत्ता लगाउने प्रयास गरिरहेको छ। हेलिकप्टर दुर्घटनाको कारणबारे अहिलेसम्म आधिकारिक जानकारी सार्वजनिक भएको छैन। घटनाबारे थप विवरण आउन बाँकी छ।
टिप्पणी तथा प्रतिक्रिया
यस समाचारबारे आफ्नो विचार तथा प्रतिक्रिया राख्नुहोस्।