काठमाडौं १३ कार्तिक । सर्वोच्च अदालतका प्रधानन्यायाधीश डा. मनोजकुमार शर्मा र न्यायाधीश हरि फुयाललाई विवादास्पद व्यक्ति इनम सापकोटासँग जोडेर सञ्चारमाध्यममा आएका समाचारबारे सर्वोच्च अदालतको फुलकोर्ट बैठकमा छलफल भएको छ । शुक्रबार बिहान बसेको फुलकोर्ट बैठकमा इनम सापकोटा प्रकरणपछि उत्पन्न परिस्थितिका विषयमा न्यायाधीशहरूले छलफल गरेका हुन् ।
सर्वोच्च अदालत स्रोतका अनुसार बिहान सवा ९ बजे सुरु भएको बैठक साढे १० बजेसम्म चलेको थियो । करिब एक घण्टा १५ मिनेट चलेको बैठकमा समसामयिक विषयका रूपमा उठाइएको इनम सापकोटासँग न्यायाधीशहरूलाई जोडेर आएका समाचारले प्रमुख स्थान पाएको थियो ।
बैठकमा विषयले प्रवेश पाए पनि यसबारे थप छलफल आवश्यक रहेको भन्दै सोमबार पुनः फुलकोर्ट बैठक बोलाउने तयारी गरिएको स्रोतले जनाएको छ । यसअघि प्रधानन्यायाधीश शर्माले इनम सापकोटासँग जोडेर आएका समाचारप्रति आपत्ति जनाउँदै विज्ञप्तिमार्फत खण्डन गरेका थिए । त्यस्तै, न्यायाधीश हरि फुयालले पनि बिहीबार इनम सापकोटासँगको भेटबारे आफ्नो धारणा सार्वजनिक गर्दै स्पष्टीकरण दिएका थिए ।
यस प्रकरणले न्यायालयको नेतृत्व र न्यायाधीशहरूलाई विवादमा तानेपछि नेपाल बार एसोसिएसनले समेत घटनाको निष्पक्ष छानबिन गर्न माग गरिसकेको छ । सोमबार बस्ने फुलकोर्ट बैठकलाई यस विषयमा थप छलफल र संस्थागत धारणा निर्माणका दृष्टिले चासोका साथ हेरिएको छ ।
टिप्पणी तथा प्रतिक्रिया
यस समाचारबारे आफ्नो विचार तथा प्रतिक्रिया राख्नुहोस्।