काठमाडौं, ५ असोज । निर्वाचन आयोगले मतदाता नामावली संकलन खुलाउन ऐन संशोधनका लागि सरकारसँग प्रस्ताव पेश गरेको छ। यसअघि मतदाता नामावली केवल चुनाव मिति घोषणा भएपछि मात्र संकलन गर्न मिल्ने व्यवस्था थियो।
आयोगका पदाधिकारीहरूले आइतबारको बैठकमा मतदाता नामावली ऐनको दफा ४ संशोधन गरी आवश्यक परेमा नामावली खोल्न सक्ने प्रावधान राख्ने निर्णय गरेका हुन्। मन्त्रिपरिषद्ले यसलाई अध्यादेशमार्फत् लागू गर्ने सम्भावना पनि रहेको बताइएको छ। हाल १८ वर्ष पुगेका धेरै युवाहरूको नाम मतदाता सूचीमा छुट्ने समस्या देखिएको थियो। आयोगले यो समस्या समाधानका लागि पुनः नामावली संकलन गर्न आवश्यक ठानेको छ।
त्यस्तै, विदेशमा रहेका नेपालीहरूलाई मतदानमा समावेश गर्ने विषयमा आयोगले छलफल सुरु गरेको छ। यो कामका लागि विशेषज्ञहरूको सुझाव लिइरहेको जनाइएको छ। आयोगका अधिकारीहरूले बताएअनुसार संशोधनको उद्देश्य सबै योग्य मतदातालाई मतदानमा सहभागी गराउने र मतदाता सूची अद्यावधिक गर्ने हो। यसले आगामी चुनावको तयारीमा सहजीकरण गर्ने अपेक्षा गरिएको छ।
