विद्यमान सामाजिक असमानता कायमै रहेकाले हटाउनु पर्नेमा जोड

तुलसीपुर, ३ पुस । दाङको घोराहीमा पत्रकार महिलाहरुसंग समानता र समावेशीताका लागि महिला सञ्चार शक्तिका विषयमा अन्तरक्रिया कार्यक्रम गरिएको छ । कार्यक्रमका सहभागीहरुले समाजमा विद्यमान लैङ्गिक विभेद तथा सामाजिक असमानता अझै हट्न नसकेको बताएका छन् । त्यस्ता विभेदहरु हटाउन सरकारले लैङ्गिक समानता तथा सामाजिक समावेशीकरण (जेसी) नीति ल्याएको भए पनि यसको प्रभावकारी कार्यान्वयन हुन नसकेको बताएका हुन् । जिल्लाका सञ्चार संस्थाहरुमा अहिले पनि महिलाहरुको सहभागिता कम रहेको, महिलाको नेतृत्व तथा अर्थपूर्ण सहभागितालाई वेवास्ता गरिएको पत्रकार महिलाहरुले औंल्याएका थिए ।

कार्यक्रममा सहभागी पत्रकार महिलाहरूले सञ्चारमाध्यममा उठेका मुद्धाले राज्यको नीति निर्माणमा मार्गदर्शन गरिरहँदा सवाल उठाउने पत्रकारहरुलाई राज्यले सहुलियतता प्रदान गर्न नसकेको भन्दै गुनासो गरेका थिए । सामाजिक समावेशीकरण र समानताका विषयलाई उठाउँदै गर्दा मिडिया हाउसहरुमा लैंगिक समानता कायम हुन नसकेको उनीहरुले बताए थिए । समावेशीता र समताका आधारमा पत्रकारितामा महिलाको सहभागिता चूनौतीपूर्ण बन्दै गएको सहभागी पत्रकार महिलाहरुको भनाइ थियो । राज्य तहबाटै समावेशी नितिको कार्यान्वयन नहुँदा पत्रकारितामा महिलाहरुको स्थायित्व कम हुँदै गएको प्रति चिन्ता समेत व्यक्त गरेका छन् । कार्यक्रममा पत्रकार महिलाहरुलाई सुचना संकलन र अध्ययनका पात्रका रुपमा मात्र प्रयोग गरिने, क्षमतामा प्रश्न उठाउने, महिलाको नेतृत्वलाई विश्वास नगर्ने जस्ता विषयमा छलफल गरिएको थियो । नेपालको संविधान २०७२ हरेक निकायमा लैंगिक समानता हुनुपर्ने व्यवस्था गरेपनि त्यसको प्रत्याभूत हुन नसकेको घोराही उपमहानगरपालिकाकी उपप्रमुख हुमा कुमारी डिसीले बताउनुभयो । कार्यक्रममा प्रमुख अतिथी समेत रहेकी डिसीले सञ्चारको अग्रपंक्तीमा रहेका पत्रकार महिलाहरुका सवालमा राज्य संवेदनशील बन्नुपर्ने बताउनुभयो । उहाँले जिल्लाले उठाएका मुद्धालाई आधार मानेर राज्यले नीति बनाउँदै गर्दा पत्रकारहरुको अवस्थाका बारेमा सोधखोज नहुनु दुखद भएको बताउनुभयो ।

प्रेस काउन्सील नेपालका केन्द्रीय सदस्य शरद अधिकारीले पत्रकारिता गरिरहँदा उपलव्धीबारे समिक्षा गर्न आवश्यक रहेको बताउनुभयो । ग्लोबल एटुजेड कन्सल्टेन्टका कार्यकारी निर्देशक प्रदिप मजगैँया, नेपाल पत्रकार महासंघ दाङका निवर्तमान अध्यक्ष दुर्गालाल केसी, नयाँ युगवोध दैनिककी सम्पादक लक्ष्मी आचार्यले लैंगिक समानता र सामाजिक समावेशीकरण, सञ्चारमाध्यममा महिलाको भूमिका , अवस्था र चुनौतीका बारेमा आ–आफ्नो प्रस्तुतीकरण दिएका थिए। नेपाल वान एचडी सञ्चालक मोनिका सिंहले कार्यक्रमको विषयवस्तुका बारेमा जानकारी गराउनु भएको थियो ।

ग्लोबल एटुजेड कन्सल्टेन्टको आयोजना एवम् मानव कल्याण समाज तथा वातावरण संरक्षण केन्द्र दाङ र नेपाल वान एचडीको समन्वयमा कार्यक्रम भएको हो । मानव कल्याण तथा वातावरण संरक्षण केन्द्रका निर्वतमान अध्यक्ष निर्मला गौतमको स्वागत मन्तव्यबाट सुरु भएको अभिमूखीकरणको सहजीकरण संस्थाकी सचिव माया पोख्रेलले गर्नुभएको थियो ।।