तुलसीपुर, १९ बैशाख । दाङको तुलसीपुरमा एक शिक्षकमाथी विद्यार्थीले खुडा प्रहार गरेका छन् । तुलसीपुर–६ स्थित हिमाल एकाडेमीका (कोर्डीनेटर) शिक्षक विशेष श्रेष्ठमाथी सोही विद्यालयमा पढ्ने तुलसीपुर–४ रक्षाचौरका अन्दाजी १८/१९ बर्षीय सुरेश सुनारले धारिलो हतियार खुडा प्रहार गरेको प्रहरीले जनाएको छ । प्रहरीका अनुसार आज बिहान साढे १० बजेको समयमा उनले स्कुल भित्र प्रवेश गरेर एक्कासी श्रेष्ठमाथी खुडा प्रहार गरेका हुन् । खुडा प्रहारबाट श्रेष्ठको बाया कुम र दुबै हातको पाखुरामा गहिरो चोट लागेको छ ।
घाइतेलाई राप्ती प्रादेशिक अस्पताल तुलसीपुरमा सामान्य उपचारपछी थप उपचारका लागी अन्यन्त्र रिफर गरिएको छ । यता हिमाल एकाडेमीका प्रिन्सिपल मधुसुदन केसीले आफु विद्यालय बाहिर भएकाले यसबारे विस्तृत रुपमा बुझ्न नपाएको बताउनुभएको छ । शिक्षकमाथी आफ्नै विद्यार्थीले खुडा प्रहार गरेको भन्ने सुनेको र अब विद्यालयमा गएर यसबारे बुझ्ने उहाँले बताउनुभयो । यता इलाका प्रहरी कार्यालय तुलसीपुरका सूचना अधिकारी तथा प्रहरी निरीक्षक सुर्य रानाले घटनालगत्तै प्रहरी टोली पुगे पनी घटनामा संलग्न व्यक्ती फरार रहेकाले खोजी भइरहेको जानकारी दिनुभयो ।।
