बाटोमा रोकिराखेको ट्रकसँग बस ठोक्किँदा २० जना घाइते

चितवन, २७ माघ ।  चितवनमा गएराति बस दुर्घटना हुँदा २० जना घाइते भएका छन् । घाइतेमध्ये दुई जनाको अवस्था गम्भीर रहेको प्रहरीले जनाएको छ । प्रहरीका अनुसार पूर्वपश्चिम राजमार्गअन्तर्गत राप्ती नगरपालिका–२ गड्यौलीमा रौतहटबाट काठमाडौँतर्फ जाँदै गरेको बा प्र ०१–००६ ख २००४ नम्बर बस गएराति सडक छेउमा रोकिराखेको प्र २०३–००१ ख ७३१२ नम्बरको ट्रकसँग ठोक्किएको हो ।

घाइते सबै बसका यात्रु रहेको जिल्ला ट्राफिक प्रहरी कार्यालय चितवनका प्रमुख सुरेश सुवेदीले जानकारी दिनुभयो । उनीहरूको उपचार चितवन मेडिकल कलेज भरतपुरमा भइरहेको छ । फरार बसचालकको खोजी गरिरहेको प्रमुख सुवेदीले बताउनुभयो ।