जाजरकोट,२८ पौष ।जाजरकोट भूकम्पपछि भत्किएका घरबाट निकालिएका काठ एक ठाउँबाट अर्को ठाउँ लैजान नपाइने भएको छ । भूकम्प प्रभावितले जिल्ला बाहिरबाट काठ ल्याउन र बाहिर लैजाने सोच बनाए पनि विद्यमान कानुनी व्यवस्थाले त्यसो गर्न नमिल्ने भएको हो । जिल्ला विपद व्यवस्थापन समितिका अनुसार जाजरकोटमा ३५ हजार १ सय ४० घरमा पूर्ण क्षति पुगेको छ भने २६ हजार ९ सय ४६ अस्थायी आवास बनाउनुपर्नेछ । त्यसका लागि एक ठाउँबाट अर्को ठाउँमा काठ लैजान नपाउने नीति बाधक रहेको भेरी नगरपालिका वासुदेव शर्माले बताउनुभयो । भत्किएका भवनबाट निक्लिएको काठ जिल्ला बाहिर बिक्रिवितरणमा लैजाने कानूनी व्यवस्था नभएकोमा भूकम्प प्रभावितहरूले पनि सरोकारवाला निकायसँग गुनासो गर्दै आएका छन् । डिभिजन वन कार्यालय जाजरकोटका प्रमुख राधाकृष्ण दासले बिक्री वितरणका लागि अहिलेसम्म वन ऐन नियमावलीमा त्यस्तो व्यवस्था नहुने अवस्थालाई सहजीकरण गरिदिन मन्त्रालयलाई अनुरोध गरेको बताउनुभयो । भूकम्प प्रभावितलाई अस्थायी आवास निर्माणका लागि सामुदायिक वन उपभोक्ता समूहले आफ्नो मापदण्ड र कार्यविधिअनुसार काठ सहयोग गर्दै आएका छन् ।
टिप्पणी तथा प्रतिक्रिया
यस समाचारबारे आफ्नो विचार तथा प्रतिक्रिया राख्नुहोस्।