लुम्बिनीमा विषयगत समितीका सभापतिहरूद्वारा सपथ ग्रहण

भालुवाङ ५ बैशाख । लुम्बिनी प्रदेशका ७ वटा बिषयगत समितीका सभापतिहरूले सपथ ग्रहण गरेका छन्। लुम्बिनी प्रदेशसभाको सचिवालयमा सभामुख तुलाराम घर्तीले सपथ ग्रहण गराउनु भएको हो । लुम्बिनी प्रदेशका ६ वटा विषयगत समिती र १ विषेशाधिकार समिती गरी ७ वटा समितीमा निर्बिरोध निर्वाचित भएपछि आज बुधबार संसद सचिवालयमा सपथ तथा पदभार गराइएको छ ।

दलहरुका बीच सहमति गरी विषयगत समितीको भागबन्डा गरी सभापति टुङ्गाइएको थियो । जस अनुसार प्रदेश मामिला तथा कानुन समितिको सभापतिमा रुकुम पूर्वकी सांसद दिलकुमारी बुढा, सामाजिक विकास समितिको सभापतिमा गुल्मीका सांसद यमबहादुर नेपाली, कृषि, वन तथा वातावरण समितिको सभापतिमा नबलपरासीका सांसद विश्वप्रेम पाठक र भौतिक पूर्वाधार विकास समितिको सभापतिमा अर्घाखाँचीका सांसद रामजीप्रसाद घिमिरे रहेका छन्। यस्तै अर्थ, उद्योग तथा पर्यटन समितिको सभापतिमा पाल्पा  राजुप्रसाद श्रेष्ठ, सार्वजनिक लेखा समितिको सभापतिमा बाँकेकी सांसद माया पुन र विशेष अधिकार समितीको सभापतिमा कपिलबस्तुका सांसद गिरीधारीलाल न्यौपाने रहेका छन् । ६ वटा विषयगत समिती भएपनि दलहरुले छलफल गरी विशेष अधिकार समितीको माग भएकाले त्यसको पनि यस पटक देखि नयाँ व्यवस्था गरिएको प्रदेशसभा सचिव दुर्लभकुमार पुनले जानकारी दिनुभयो । यसैविच सभापतिहरूले सपथ ग्रहण गरेसंगै आजै पदभार ग्रहण समेत गरेका छन्। सपथ ग्रहणपछि पदभार ग्रहण गर्दै बिषयगत समितीका सभापतिहरूले अब संसद र सरकारको कामलाई तीब्र गतिमा अगाडि बढाउने गरी काम गर्ने बताउनुभयो । संसदमा सांसदहरूले उठाउनु भएको बिषयहरूमा बिषयगत समितीमा छलफल गरेर कामहरूलाई तीब्रता दिइने समेत बताएका छन् । लामो समयदेखि चयन हुन नसकेको लुम्बिनी प्रदेशको विषयगत समितीमा दलहरुबीच भएको सहमति अनुसार एमालेले विषेश अधिकार सहित ३ वटा समिती, प्रमुख प्रतिपक्षी दल नेपाली काग्रेसले २ वटा र माओवादी केन्द्रले २ वटा समितीको नेतृत्व गर्ने सहमतिमा सभापति चयन गरिएको थियो ।

गत ३० असारको लुम्बिनी प्रदेशसभा बैठकले समितीमा रहने सदस्यहरुको टुंगो लगाए पनि समितीको सभापतिको टुंगो भने १७ महिनासम्म लाग्न सकेको थिएन । २०७९ मंसिर ४ गते निर्वाचन भएपछि ३ जना मुख्यमन्त्री फेरिदा पनि मिनी संसदको रुपमा हेरिने विषयगत समितीको नेतृत्व चयन हुन नसक्दा प्रदेशसभा सदस्यहरु विजिनेस बिहिन जस्तै बनेका थिए ।।