युवाहरु डिजेमा आकर्षित हुँदा मघौटा गीतको मौलिकता हराउँदै

तुलसीपुर, ५ माघ । माघको पाचौ दिन अर्थात थारु समुदायमा माघ मनाउने अन्तिम दिन आज पनि थारु समुदायमा माघ मनाउने क्रम जारी छ । घरघरमा जाने र मघौटा गीतमा नाच्ने क्रम आजसम्म रहने गर्दछ । तर पछिल्लो समय युवा पुस्ता मघौटा गीत छोडेर डिजेमा आकर्षित हुदा गाउँ–गाउँमा सुनिने मघौटा भाका, गीत, मघौटा नाचसँगै माघको मौलिकता हराउन थालेको छ । मादल, झ्याली, कस्तार लगायतका बाजा बजाएर लहंगा र सट्की लगाएर नाच्ने चलनमा पछिल्लो कमी आएको पाइएको छ । माघमा थारुहरुको मौलिक बाजागाजा, माघमा गाउने मौलिक गीतका भाकाहरु प्रस्तुत गरिन्छ । तर नयाँ पुस्ताका युवाहरु डिजेमा आकर्षित भएकोले माघको मौलिकता घटेको थारु समुदायका अगुवारुहरुले बताउँछन् । तुलसीपुर उपमहानगरपालिका ५ की शुशीला चौैधरीले आजभोलीका युवा पुस्ताले माघको कौलिक गीतहरु नगाएर डिजेमा आकर्षित हुने र डिजे (साउन्ड सिस्टम) बजाएर नाच्ने गरेको बताउनुभयो । यसले गर्दा थारुहरुको मौलिक मघौटा गीत र नाच लोप हुँदै जाने होकी भन्ने चिन्ता रहेको उहाँको भनाइ छ । आजभोलीका नयाँ पुस्ताहरुले मघौटा गीत समेत गाउन नजान्ने र माघमा अन्य समयमा गाइने गीत गाउने गरेको उहाँले बताउनुभयो । मघौटा गीतमा महिला पुरुष तथा छोरीचेलीको वेदना ओतप्रोत भएका गीतहरु गाउन छोेड्दै नयाँनयाँ अन्य गीतहरु गाउने गरेकाले मघौटा गीतको मौलिकता हराउँदै गएको थारु संस्कृतिका जानकार छविलाल कोपिला (थारु)ले बताउनुभयो ।।