तुलसीपुर, १२ पुस । केही दिन यता दाङको तुलसीपुर सांघातिक आक्रमणका घटना बढ्न थालेका छन् । दुई दिनको अवधिमा तुलसीपुर बजारका विभिन्न स्थानमा ३ जना युवकमाथि आक्रमण भएको छ । मंगलबार राति साढे ८ बजे ३ जना युवाको आक्रमणबाट तुलसीपुरको न्युरोडमा एक ड्राइभर घाइते भएको प्रहरीले बताएको छ । सडकमा हिडिरहेका ट्याक्टर चालक तुलसीपुर –६ निवासी प्रताप रानालाई युवाको समूहले फलामको नखले प्रहार गर्दा टाउकाको विभिन्न भाग काटिएको छ ।
घटनामा संलग्न रहेको आरोपमा तुलसीपुर– ६ निबासी राजेश मगरलाई प्रहरीले नियन्त्रणमा लिएको छ । अन्य दुई जना भने फरार भएका छन् । त्यसैगरी पुस ११ गते साँझ युवाहरूको एक समूहले तुलसीपुरको हात्तीखौवामा रड प्रहार गर्दा २ जना युवा घाइते भएका थिए । सामूहिक रुपमा व्यक्तिमाथि आक्रमण हुन थालेपछि नागरिकहरू त्रसित हुन थालेको छन् । तुलसीपुर क्षेत्रमा विभिन्न खाले घटनाहरूमा वृद्धि हुन थालेपछि नागरिकहरूले प्रहरीको काम गराई शैलीमा प्रश्न गर्न थालेका छन् ।
यता प्रहरीले पनि आपराधिक घटनामा वृद्धि भएको स्वीकार गरेको छ । तर नियन्त्रणका लागि भने विशेष सुरक्षा योजना र रणनीति बनाएको पाइदैन् । चिसोमा केहि युवाहरुले मादक पदार्थ सेवन गर्ने गरेका कारण यस्ता घटनामा वृद्धि भएको इलाका प्रहरी कार्यालय तुलसीपुरका प्रहरी निरीक्षक पर्वत केसीले जानकारी दिनुभयो ।
