तुलसीपुरखबर, ५ बैशाख
जिल्ला आदालत मकवानपुरले हिरा लुटपाटमा संलग्न पत्रकार र तीनजना प्रहरीलाई पुर्पक्षका लागि थुनामा पठाएको छ ।
शुक्रबार जिल्ला न्यायाधीश दिल्लीराज श्रेष्ठको इजलाशले ललितपुरको भैंसेपाटी बस्ने १९ वर्षीय पत्रकार सुजन आचार्य, वीरेन्द्रनगर १२ सुर्खेत घर
भएका नेपाल प्रहरीका असई २६ वर्षीय सुरेन्द्र बहादुर बसेल, शिवालय २ जाजरकोट घर भएका नेपाल प्रहरीका जवान २७ वर्षीय वीरबहादुर बस्नेत र सिउजा १, दाङ घर भएका २८ वर्षीय प्रहरी जवान हिमकान्त पुन मगरलाई पुर्पक्षका लागि थुनामा राख्न आदेश दिएको हो ।
एक जनालाई भने धरौटीमा छोड्न अदालतले आदेश दिएको छ ।
इलाका प्रहरी कार्यालय पालुङका प्रहरी निरीक्षाक विकास तामाङ नेतृत्वको प्रहरीले मकवानपुरको कैलाश गाउँपालिका ५ चौकीटारी धनलक्ष्मी गुरुङको हिरा लुटेको आरोपमा पत्रकार सुजन आचार्यसहित अन्य तीन प्रहरीलाई चैत ७ गते पक्राउ गरेको थियो ।
प्रहरीले उनीहरुको साथबाट एक थान हिरा, गोली लोड गरिएको अवस्थामा प्रहरीकै पेस्तोल एक थान, चार थान सञ्चार सेट, दुई थान मेटल डिटेक्टर, एक थान क्यामेरा, एक थान ल्यापटप र ७ थान मोबाइल बरामद गरेको थियो ।
