स्रोत नखुलेको ९८ लाख रुपैयाँसहित दुईजना पक्राउ

काठमाण्डौ, २८ बैशाख ।  स्रोत नखुलेको ९८ लाख रुपैयाँसहित बिहान काठमाण्डौबाट पक्राउ परेका दुई जनामध्ये एक जना यसअघि सुन तस्करीमा संलग्न भएको खुलेको छ । काठमाण्डौ उपत्यका अपराध अनुसन्धान कार्यालयले बिहान रुपन्देहीको सियारी गाउँपालिका–७ का समिर सुनार र मिलन विकलाई पक्राउ गरेको थियो ।

पक्राउ परेकामध्ये मिलन विक यसअघि २०८० साल असोज १० गते दोलखामा साढे ११ किलो अवैध सुन पैठारी तथा संलग्नमा पक्राउ पुर्जी जारी भई फरार भएको पाइएको काठमाण्डौ उपत्यका अपराध अनुसन्धान कार्यालयले जनाएको छ । मिलन र समिरलाई बा १३ च ४८५८ नम्बरको गाडीमा स्रोत नखुलेको ९८ लाख रुपैयाँ रकमसहित काठमाण्डौको दरबारमार्गबाट प्रहरीले पक्राउ गरेको थियो ।।