रुकुममा जुवातास खेलिरहेको अवस्थामा ३ जना पक्राउ

रुकुम,२७ कात्तिक । रुकुम पश्चिमको चौरजहारी नगरपालिकाबाट जुवातास खेलिरहेको अवस्थामा तीन जना पक्राउ परेका छन् । चौरजहारी नगरपालिका–२ स्थित बसपार्कबाट बिहीबार राति जुवातास खेलिरहेको अवस्थामा चौरजहारी नगरपालिका–१ निवासी ३५ वर्षीय दीपक नेपालीसहित तीन जनालाई प्रहरीले पक्राउ गरेको हो ।

जिल्ला प्रहरी कार्यालय रुकुम पश्चिमबाट खटिएको प्रहरी टोलीले उनीहरूलाई नगद ५६ हजार ९ सय ९० रुपैयाँ र एक बुक ताससहित पक्राउ गरेको जनाएको छ । पक्राउ परेका तीनै जनामाथि आवश्यक अनुसन्धान भइरहेको प्रहरीले जनाएको छ ।