दाङको टरिगाउँ विमानस्थल कुनै एउटा दल, नेता वा सरकारको मात्र विषय होइन । यो दाङवासीको दशकौँदेखिको अपेक्षा, हाम्रो क्षेत्रको आर्थिक सम्भावना र नागरिकको सहज आवागमनसँग जोडिएको महत्वपूर्ण सार्वजनिक पूर्वाधार हो । वर्षौँदेखि विमानस्थल विस्तारको चर्चा भयो, विभिन्न समयमा प्रतिबद्धता व्यक्त भए, अध्ययन तथा योजना बने। तर अपेक्षाअनुसार विस्तार हुन नसक्नु हामी सबैका लागि गम्भीर समीक्षा र आत्ममूल्यांकनको विषय हो।
हाल विमानस्थल विस्तारका लागि बजेट विनियोजन हुनु सकारात्मक सुरुवात हो। यसलाई उपलब्धि मानेर ढुक्क बस्ने होइन, कार्यान्वयनको ठोस आधार बनाउनु आजको आवश्यकता हो। किनकि बजेट विनियोजन हुनु र आयोजना सम्पन्न हुनु एउटै कुरा होइन। म स्पष्ट रूपमा भन्न चाहन्छु—अब टरिगाउँ विमानस्थलको विषय राजनीतिक आरोप–प्रत्यारोप, श्रेयको प्रतिस्पर्धा र चुनावी नारामा सीमित हुनुहुँदैन। प्राविधिक रूपमा उपयुक्त विकल्पको टुङ्गो, आवश्यक जग्गाको न्यायोचित व्यवस्थापन, पर्याप्त बहुवर्षीय बजेट, जिम्मेवार निकायको स्पष्ट भूमिका र निर्माणको समयसीमा सार्वजनिक गरिनुपर्छ ।
यो प्रक्रियामा स्थानीय नागरिक, जग्गाधनी, तुलसीपुर उपमहानगरपालिका, सम्बन्धित जनप्रतिनिधि, नेपाल नागरिक उड्डयन प्राधिकरण र संघीय सरकारबीच प्रभावकारी समन्वय आवश्यक छ। जग्गा व्यवस्थापन गर्दा स्थानीय नागरिकको अधिकार, उचित मुआब्जा र न्यायपूर्ण प्रक्रियालाई पनि उत्तिकै महत्व दिनुपर्छ।
दाङको विकास कुनै एक व्यक्तिको सफलता वा असफलताको विषय होइन। यो हाम्रो साझा जिम्मेवारी हो। विगतमा जसले पहल गर्नुभयो, उहाँहरूको योगदानको सम्मान गर्दै जहाँ कमजोरी भए, त्यहाँबाट सिकेर अब परिणाममुखी ढङ्गले अघि बढौं। मेरो आग्रह स्पष्ट छ—टरिगाउँ विमानस्थललाई घोषणाबाट कार्यान्वयनमा, बजेटबाट निर्माणमा र निर्माणबाट नियमित तथा भरपर्दो हवाई सेवामा पु¥याऔँ। दाङवासीले अब अर्को आश्वासन होइन, कामको प्रगति देख्न आतुरछन । यो आयोजना पूरा गर्न आवश्यक समन्वय, पारदर्शिता र जवाफदेहिताका लागि म आफ्नो स्तरके जिम्मेवारीअनुसार निरन्तर पहल गर्ने प्रतिबद्धता व्यक्त गर्दछु। टरिगाउँ विमानस्थलको विकास दाङको साझा सपना हो; यसको सफल कार्यान्वयन हाम्रो साझा जिम्मेवारी हो ।
“टरिगाउँ विमानस्थललाई राजनीतिक विवादको विषय होइन, समयसीमा, बजेट र जवाफदेहितासहित सम्पन्न गर्नुपर्ने सार्वजनिक प्रतिबद्धताको विषय बनाऔँ। विगतका कमजोरीबाट सिकौँ, वर्तमानका अवसरलाई सदुपयोग गरौँ र दाङवासीलाई परिणाम देखाऔँ।”यहि नै सबै राप्ति बासिको साझा संकल्प बनाऔ ।
टिप्पणी तथा प्रतिक्रिया
यस समाचारबारे आफ्नो विचार तथा प्रतिक्रिया राख्नुहोस्।