काठमाडौं,२६ असोज। आईसीसी टी–२० विश्वकप एसिया तथा इस्ट एसिया प्यासिफिक छनोटको सुपर सिक्स अन्तर्गत नेपालको टोलीले यूएईमाथि १ रनको रोमाञ्चक जित हासिल गरेको छ। खेलमा नेपालले दिएको १४१ रनको लक्ष्य पछ्याउँदै यूएईले २० ओभरमा ९ विकेट गुमाएर १३९ रन मात्र बनाउन सक्यो। अन्तिम क्षणसम्म उतार–चढावपूर्ण खेलमा नेपालको जितले रोमाञ्चको चरम रुप लिएको थियो। यूएईका अलिशान सराफूले उत्कृष्ट अर्धशतकीय पारी खेल्दै ५८ रन जोडे भने ध्रुव पराशरले ३८ रनको योगदान दिए। एक समय ८२–१ को बलियो स्थितिमा पुगेको यूएई नेपालका बलरहरूमुखि दबाबमा परेको थियो।
अन्तिम ओभरमा यूएईलाई १० रन आवश्यक थियो। बलिङका लागि आएका दीपेन्द्र सिंह ऐरीलाई पराशरले पहिलो बलमै छक्का प्रहार गरे पनि अर्को बलमा उनले क्याच आउट गराए। त्यसपछि २ बलमा ३ रन आवश्यक रहँदा यूएई रनआउट र शर्ट रनको कारण रन जोड्न असफल रह्यो। अन्तिम बलमा १ रन मात्र बनाउन सकेपछि नेपाल १ रनले विजयी भयो। नेपालका लागि दीपेन्द्रले उत्कृष्ट बलिङ गर्दै ४ ओभरमा २२ रन खर्चेर ३ विकेट लिए। सन्दीप लामिछाने, सोमपाल कामी र गुलशन झाले १–१ विकेट जोडे। यसअघि, टस जितेर पहिले ब्याटिङ गरेको नेपालले ओपनर आसिफ शेखको अर्धशतकको मद्दतमा २० ओभरमा ६ विकेट गुमाउँदै १४० रनको योगफल तयार पारेको थियो। आसिफले ४७ बलमा ५१ रन बनाए भने कुशल भुर्तेलले २८ र कप्तान रोहित पौडेलले २० रनको योगदान दिए। गुलशन झाले ५ बलमा १४ रन जोडे।
नेपालले पहिलो १० ओभरमा ७३ रन बनाए पनि दोस्रो आधामा रन गति सुस्त भएको थियो। यूएईका बलरहरू मध्ये जुनेद सिद्दिकी, मुहम्मद रोहिद, जाहिद अली, ध्रुव पराशर, हर्षित कौशिक र हेदर अलीले समान १–१ विकेट लिए। यो जितसँगै नेपालले सुपर सिक्स चरणमा आफ्नो अभियानलाई थप सशक्त बनाएको छ।
