जीप दुर्घटना हुँदा २ जनाको मृत्यु

म्याग्दी, ५ चैत ।  म्याग्दीको अन्नपूर्ण गाउँपालिका–५ नेपानेमा जीप दुर्घटना हुँदा दुई जनाको ज्यान गएको छ । गाउँपालिकाको केन्द्र पोखरेबगरबाट पाउद्वारतर्फ गुडिरहेको ग १ ज ७६५३ नम्बरको जीप दुर्घटना हुँदा गाडी धनी एवम् चालक ३७ वर्षका गणेश श्रेष्ठ र पाउद्वारका २७ वर्षका लालबहादुर तिलिजाको ज्यान गएको प्रहरीले जनाएको छ ।

सडकदेखि तल खोँचमा दुर्घटनाग्रस्त अवस्थामा भेटिएको जीपबाट श्रेष्ठ र तिलिजाको शव भेटिएको उहाँले बताउनुभयो । हिजो राति पोखरेबगरबाट हिँडेको जीप पाउद्वार नपुगेको खबर आएपछि खोज्ने क्रममा आज बिहान भिरमा अड्किएको अवस्थामा फेला परेको हो ।।