एक हप्ता अघि दाङका प्रमुख जिल्ला अधिकारी दिर्घनारायण पौडेलको सरुवा भईसकेपछि उहाको ठाउँमा नयाँ प्रमुख जिल्ला अधिकारीका रुपमा राम बहादुर कुरुङवाङ आउनुभयो । उहा आएको भोलिपल्ट घोराही तुलसीपुर सडकखण्ड अन्र्तगत पर्ने पत्रेखोलाको अनुगमन भयो । अनुगमनका क्रममा उहाले पत्रेखोलामा समयमै पुल नबन्दा नागरिकले पाएको सास्तीका बारेमा पहलकदमी चाल्ने प्रतिबद्धता व्यक्त गर्नुभयो ।त्यसपछि उहाको चर्चा सुरु भयो । नयाँ सिडियोका रुपमा आउनु भएका कुरुङवाङले चासो देखाउदा उहाको चर्चा पनि भयो । अहिले उक्त पुलको कजवे मर्मतको काम सुरु भएको छ । यद्यपी सडक डिभिजन कार्यालय दाङले आफुहरुको कार्ययोजना अनुसार कजवे मर्मतको काम सुरु भएको बताएको छ ।
यस्तैगरी जिल्ला प्रहरी प्रमुख गणेस चन्दको सरुवा भएपछि उहाको ठाउँमा अहिले नयाँ एसपी सुरेस काफले आउनु भएको छ । उहा आएको केहि दिनमै विभिन्न समयमा मोटरसाईकल चोरी गर्ने आठ जना गिरोहलाई १३ वटा मोटरसाईकल सहित पत्रकार सम्मेलन गरी सर्वाजनिक गरियो । यो विषय पनि चर्चाको विषय बन्यो । चोरी भएका मोटरसाईकल भेटिए ।यस्तै ईलाका प्रहरी कार्यालय तुलसीपुरका प्रमुख डिएसपी शिव बहादुर सिंहको सरुवा भएको हप्ता दिन पछि नयाँ डिएसपीका रुपमा श्यामु अर्याल आउनु भयो । उहा तुलसीपुरको डिएसपीका रुपमा आएको केहि दिनमै तुलसीपुर ९ कट्कुईयाँबाट पाँच जना जुवाडे एक लाख बढि नगद सहित समातिए ।
त्यसपछि तुलसीपुरमा प्रहरीको चर्चा सुरु हुन थाल्यो । अहिले नयाँ डिएसपी आएका छन् रे त्यहि भएर जुवाडेहरु समातिए । डिएसपी अर्याल आए लगतै उनीहरु समातिए पछि चियागफमा गफिनेहरुलाई यो कुनै नौलो कुरा लागेन तर पनि उनीहरुले डिएसपी फेरिनै बित्तिनै नयाँ आउने जोसुकैले पनि कडा गरिहाल्छनी भन्दै थिए । यो सुरु सुरुमा मात्रै हो पछि त यस्तै त होनी ? उनीहरुको आशय थियो जो सुकै सुरक्षा प्रमुखले पनि सुरुमा मात्रै नभई आफुहरुको कार्य अवधी सम्म यसैगरी निरन्तर कडाई गरे राम्रो हुने थियो ।
यसरी जिल्लामा प्रमुख जिल्ला अधिकारी सहित सुरक्षाकर्मी आएसंगै नागरिकले थप नयाँ काम र भरपर्दो सुरक्षाको अपेक्षा गरेका हुन्छन् । तर सुरुमा निकै कडा रुपमा प्रस्तुत हुने र विस्तारै कडाई गर्न छाड्ने प्रबृत्तिले गर्दा नयाँ आउने प्रमुखहरुको विश्वसनियता माथी प्रश्न उठ्ने गर्दछ । त्यसैले सुरक्षा निकायका प्रमुखहरुको सरुवा वा बढुवा हुने कुरा एउटा प्रक्रिया नै हो । तर उनीहरुले गर्ने काम र कार्यशैली प्रमुख कुरा भएकाले प्रभावकारी भुमिका निर्वाहमा ध्यान दिनु जरुरी छ । ताकी एक छिनको चर्चा र तारिफ नभई सधैभरीको प्रशंसयोग्य रहि रहोस् ।
