पश्चिम दाङको ओदाले–सुनपुर जोड्ने सडकको अवस्था नाजुक

तुलसीपुर, २३ श्रावन ।  पश्चिम दाङको पञ्चकुले हुदै ओदाले–सुनपुर जोड्ने सडक विग्रिदा सवारी आवागमनमा समस्या भएको छ । बबई गाउँपालिका–६ को पञ्चकुले हुदै वडा नम्बर ७ को ओदाले जोड्ने सडकको बिच–बिचमा खाल्टाखुल्टी र उकालो बाटोमा चिरा परेका कारण सवारीसाधन सञ्चालनमा धेरै समस्या भएको सवारी चालकहरुले गुनासो गरेका छन् । सडकको अवस्था राम्रो नहुदा दुर्घटनाको जोखिम बढ्नुका साथै गाडीसमेत विग्रने समस्या रहेको ओदाले–तुलसीपुर चल्ने बसका साहु ज्ञान बहादुर भण्डारीले बताउनुभयो । यात्रु बोकेर ओदाले –सुनपुर हुदै तुलसीपुर आउने क्रममा गाउँतिरको सडकमा खाल्टाखुल्टी हुदा बस चिप्लेर फस्ने गरेको उहाँले बताउनुभयो । उकालो सडकमा झनै गाडी फस्ने भएकाले ट्याक्टर लगाएर गाडी निकाल्दै चलाउदै गर्नुपर्ने बाध्यता रहेको उहाँको भनाई छ । सडकको अवस्था राम्रो नहुदा ओदाले–सुनपुर सडकमा चल्ने मोटरसाइकल देखी, अटो, यात्रुबहाक बस, स्कुल बसलगाएतका सवारीलाई धेरै सास्ती हुने गरेको छ । सडकमा ग्राभेल पनि नबिछ्याइएको र नाला पनि नकाटिएकाले अवस्था झन जिर्न बन्दै गएको स्कुल बसका चालक दिपक वलीले बताउनुभयो ।

जंगल क्षेत्रको सडकमा खाल्टाखुल्टी हुदा दुर्घटनाको जोखिम बढेको र कतिपय स्थानमा बस जान सक्ने अवस्था नभएका कारण विद्यार्थीहरुलाई बिच जंगलमै छोड्ने गरेको उहाँले बताउनुभयो । सडक विग्रिएको स्थान वडा नम्बर ६ र ७ को सिमानामा पर्ने भएकाले पनि मर्मतमा दुई वडाले आलोपालो गर्दा यस्तो अवस्था आएको स्थानिय अटो चालक चित्र बहादुर खत्रीले बताउनुभयो । यसले गर्दा यात्रुले भनेको बेला सेवा दिन नसकिएको उहाँको भनाई छ । सडक मर्मतको लागी वडामा निबेदन दिएपनि सडकको अवस्था फेरिन नसकेको उहाँले बताउनुभयो । सडकमा ठुल्ठुला खाडल र त्यसैमाथी पानी जम्मा भएकै कारण पैदलयात्रीले समेत बाटोमा हिड्दा सास्ती खेप्नु परेको गुनासो गरेका छन् । यता बबई गाउँपालिका–७ का वडाअध्यक्ष तिलक भण्डारीले भने केहीदिन अगाडी मात्रै सामान्य रुपमा सडक मर्मत गरेपनि फेरी पानीले विगारेको हुन सक्ने बताउनुभएको छ । सो सडक मर्मतका लागी बजेटसमेत विनियोजन भइसकेको उहाँले बताउनुभयो । अहिले बर्खाको अवस्थामा खोलाबाट ग्राभेल उठाउन नमिल्ने भएकाले समस्या भएको भन्दै वडाअध्यक्ष भण्डारीले अब कानुनी प्रकृया पुरा गरी जतिसक्यो छिटो सडकको अवस्था सुधार गर्ने दाबी बताउनुभयो ।।