अमेरिकामा पहिलो चरणमा ६४ लाखलाई खोप दिइने

वासिङ्टन — अमेरिकी सरकारले कोभिड–१९ को खोप वितरण गर्ने योजना अघि सारेको छ । फाइजर कम्पनीले निर्माण गरेको खोप अमेरिकी नियामक निकायबाट आपत्कालीन प्रयोगका लागि स्वीकृति पाएलगत्तै सम्भवतः डिसेम्बरमा पहिलो चरणमा ६४ लाख व्यक्तिमा लगाइने जनाइको छ ।

अमेरिकी खाद्य तथा औषधि प्रशासन (एफडीए) को एक समितिको डिसेम्बर १० बस्ने बैठकले यसबारे निर्णय गर्ने जनाइएको छ । अमेरिकामा कोभिड–१९ संक्रमणबाट मृत्यु हुनेको संख्या र नयाँ संक्रमित बढेका कारण पनि खोपलाई आपत्कालीन प्रयोग गर्नुपर्ने अवस्था सिर्जना भइसकेको विज्ञहरूले बताएका छन् ।

मंगलबार सार्वजनिक पछिल्लो तथ्यांकमा अमेरिकामा मृत्यु भएकाहरूको संख्या २ लाख ६० हजार नाघिसकेको छ । कम्तीमा १ करोड २५ लाख मानिस संक्रमित भएका छन् । २४ घण्टाको अवधिमा २ हजारभन्दा बढी मानिसको भाइरसको संक्रमणका कारण मृत्यु भएको जनाइएको छ । उक्त अवधिमा १ लाख ६७ हजार व्यक्तिमा संक्रमण देखिएको छ ।

प्रकाशित मिति : २०७७ मङ्सिर ११ गते बिहिवार
प्रतिक्रिया