तुलसीपुरमा वन दिवस मनाइयो, वन संरक्षणमा युवाको सहभागिता बढाउनुपर्नेमा जोड

दाङ, २६ श्रावण ।  दाङको तुलसीपुरमा सामुदायिक वन तथा वन संरक्षणमा युवाको सहभागिता बढाउँदै हरित अर्थतन्त्र र दिगो व्यवस्थापनमा जोड दिनुपर्ने सरोकारवालाले बताएका छन् । वन दिवस–२०८३ को अवसरमा तुलसीपुरमा आयोजित कार्यक्रममा सहभागीहरूले वन संरक्षणलाई केवल सरकारी निकायको जिम्मेवारीका रूपमा नहेरी स्थानीय समुदाय, युवा तथा उपभोक्ताको सक्रिय सहभागिता आवश्यक रहेको बताएका हुन् । “अबको सामुदायिक वनः युवा सहभागिता, हरित अर्थतन्त्र र दिगो व्यवस्थापन” भन्ने मूल नाराका साथ सामुदायिक वन उपभोक्ता महासंघ नेपाल, स्थानीय वन महासंघ तुलसीपुर दाङको आयोजनामा कार्यक्रम सम्पन्न भएको हो । कार्यक्रम स्थानीय वन महासंघका अध्यक्ष खेमलाल महतराको अध्यक्षता तथा प्रदेश वन महासंघ लुम्बिनीका महासचिव सोभाकर सापकोटाको प्रमुख आतिथ्यतामा भएको थियो । कार्यक्रममा प्रमुख अतिथि सापकोटाले वन संरक्षण र व्यवस्थापनमा युवाको भूमिका महत्वपूर्ण रहेको बताउनुभयो । उहाँले सामुदायिक वनलाई केवल काठ, दाउरा तथा वन पैदावारको स्रोतका रूपमा मात्रै नहेरी रोजगारी, उद्यमशीलता र स्थानीय आर्थिक विकाससँग जोड्नुपर्ने धारणा राख्नुभयो ।

वनको दिगो व्यवस्थापनका लागि उपभोक्ता, स्थानीय तह, वन कार्यालय तथा सरोकारवाला निकायबीच सहकार्य आवश्यक रहेको उहाँको भनाइ छ । युवालाई वन संरक्षणसँगै वनमा आधारित उद्यम तथा हरित अर्थतन्त्रतर्फ आकर्षित गर्न सके सामुदायिक वनबाट स्थानीय समुदायले थप लाभ लिन सक्ने उहाँले बताउनुभयो । साथै वन संरक्षणका नाममा हुने गतिविधिले वातावरणीय सन्तुलनमा असर नपर्ने गरी वैज्ञानिक र दिगो व्यवस्थापनलाई प्राथमिकता दिनुपर्नेमा पनि उहाँले जोड दिनुभयो । कार्यक्रममा सामुदायिक वन उपभोक्ता महासंघ दाङका सहसचिव भुपबहादुर केसी, सब–डिभिजन वन कार्यालय तुलसीपुरका प्रमुख खिमबहादुर केसी, ग्रीन फाउन्डेसनका उद्यम अधिकृत सुरेश रावत लगायतको सहभागिता रहेको थियो । कार्यक्रममा सामुदायिक वनको संरक्षण, दिगो व्यवस्थापन, वनमा आधारित उद्यमको विकास तथा वन संरक्षणमा युवाको सहभागिताका विषयमा छलफलसमेत गरिएको थियो । सहभागीहरूले बदलिँदो समयअनुसार सामुदायिक वनको व्यवस्थापनमा नयाँ पुस्तालाई जोड्दै वनबाट वातावरणीय संरक्षणसँगै आर्थिक लाभ लिन सक्ने वातावरण बनाउनुपर्नेमा जोड दिएका थिए ।।