काठमाण्डौ, १० भदौ । पर्साको वीरगञ्ज महानगरपालिकामा गएको शुक्रवारयता झाडापखालाका तीन सय ९१ जना बिरामी अस्पताल भर्ना भएका छन् । उनीहरु मध्ये ९५ जनामा हैजा पुष्टि भएको छ । जिल्ला जनस्वास्थ्य कार्यालय पर्साले बिहान ११ बजे सार्वजनिक गरेको विवरण अनुसार एक सय ७१ जना बिरामी उपचारपछि डिस्चार्ज भएका छन् ।
दुई सय २० जनाको विभिन्न अस्पतालमा उपचार चलिरहेको छ । अस्पतालमा रहेका मध्ये २४ जना आइसीयूमा र छ जना एचडीसीयूमा उपचाररत रहेका जिल्ला जनस्वास्थ्य कार्यालय पर्सका प्रमुख जयमोद ठाकुरले जानकारी दिनुभयो ।
वीरगञ्जमा समुदायस्तरमै हैजा फैलिएर महामारीको रूप लिएपछि महानगरपालिकासहित प्रदेश र संघस्य सरकारको तर्फबाट उपचारसँगै रोकथामको प्रयास भइरहेको छ । हिजो स्वास्थ्यमन्त्रि प्रदिप पौडेल वीरगञ्ज पुगेर अवस्थाबारे जानकारी लिँदै झाडापखालाका सबै विरामीको निशुल्क उपचार गराउन निर्देशन दिनुभयो ।
प्रदेश सरकारले पनि डाक्टरसहितको टोली खटाएको छ । महानगरपालिकाले बिरामी खोज्नेदेखी सरसफाइ र सचेतनामुलक कार्यक्रम गरिरहेको छ । पाँच दिनदेखि हैजा फैलिरहेको भए पनि त्यसको स्रोतबारे अझै एकिन भएको छैन ।
टिप्पणी तथा प्रतिक्रिया
यस समाचारबारे आफ्नो विचार तथा प्रतिक्रिया राख्नुहोस्।