प्युठान, २२ वैशाख । प्युठानको भिङग्रीमा आइतवार देखि २ दिने समाचार लेखन र न्यु मिडिया सम्बन्धी तालिम सुरु भएको छ । लुम्बिनी प्रदेश आन्तरिक मामिला तथा कानुन मन्त्रालयको सहयोगमा नेपाल पत्रकार महासंघ लुम्बिनी प्रदेश समितिको आयोजनामा तालिम सुरु गरिएको हो ।
महासंघका उपाध्यक्ष रामप्रसाद आचार्यको अध्यक्षतामा भएको तालिम उद्घाटन कार्यक्रममा नेपाल पत्रकार महासंघ लुम्बिनी प्रदेशका सचिव गोविन्द शर्मा, महासंघ प्युठानका सचिव बासुदेव गिरी, नेपाल प्रेस युनियन लुम्बिनीका सचिव शम्शेर विक्रम जिसी र प्रेस सेन्टर प्युठानका कोषाध्यक्ष सन्तोष सुनारले शुभकामना मन्तव्य व्यक्त गरेका थिए । पत्रकारहरूको लेखन सीप अभिवृद्धि तथा डिजिटल पत्रकारिता सँग अभ्यास गराउने उद्देश्यले तालिमको आयोजना गरिएको हो । तालिमको प्रशिक्षकमा अग्रज पत्रकार चेतन अधिकारी र माधव अर्याल रहेका छन् । दुई दिन सम्म सञ्चालन हुने उक्त तालिममा प्युठान र रोल्पामा कार्यरत ३५ जना पत्रकारहरूको सहभागिता रहेको छ ।
विभिन्न मिडियामा कार्यरत पत्रकारहरुको क्षमता विकासका लागि पत्रकार महासंघ लुम्बिनीले प्रदेशका १२ जिल्लाका पत्रकारहरुलाई समेट्ने गरी ६ जिल्लामा विभिन्न विधाहरुमा तालिम दिन थालेको छ । बर्दियाको ठाकुरद्वाराबाट सुरूवात गरिएको तालिम वैशाख १९ र २० गते अर्घाखाँचीको सितगंगा नगरपालिका–८ सातमारामा सम्पन्न गरि महासंघले आइतबार अर्थात वैशाख २१ र २२ गते प्युठान र रोल्पालाई समेटेर प्युठानको भिङग्रीमा तालिम सुरुवात गरिएको छ । त्यस पछि वैशाख २३ र २४ गते गुल्मी र पाल्पालाई समेटेर पाल्पाको तानसेनमा डिजिटल मिडियामा समाचार लेखन तालिम, वैशाख २५ र २६ गते पुर्वी रूकुमको रूकुमकोटमा समाचार लेखन तालिम राखेको छ । त्यस्तै रूपन्देहीको बुटवलमा तालिम आयोजना गरिएको छ ।
टिप्पणी तथा प्रतिक्रिया
यस समाचारबारे आफ्नो विचार तथा प्रतिक्रिया राख्नुहोस्।