स्कुल विभाग प्रमुखमा नेकपाकाे विवाद

सुभाष साह

सहमति जुटाउने प्रयास जारी 
 आज सचिवालय बैठक बस्दै

काठमाडौं। सत्तारुढ दल नेपाल कम्युनिस्ट पार्टी (नेकपा) को स्कुल विभागमा बिवाद देखिएको छ ।  पार्टीको वैचारिक एवं शक्तिशाली विभागका रूपमा रहेको स्कुल विभाग प्रमुखका लागि सचिवालय सदस्यद्वय नारायणकाजी श्रेष्ठ र ईश्वर पोखरेलले दाबेदारी गरेका छन् । पार्टी अध्यक्षद्वय केपी शर्मा ओली र पुष्पकमल दाहाल, वरिष्ठ नेता माधवकुमार नेपालसहित शीर्षतहमै स्कुल विभाग तत्कालीन एमालेले लिने सहमति भएको थियो ।
एमालेको भागमा परेपछि सो विभागमा उपप्रधान एवं रक्षामन्त्रीसमेत रहेका पोखरेललाई नै प्रमुख बनाउने सहमतिसमेत भइसकेको थियो । तर, तत्कालीन माओवादी नेताले पोखरेललाई ‘स्कुल विभाग प्रमुखमा स्वीकार गर्न नसकिने’ बताएपछि विवाद देखिएको छ ।

सचिवालय सदस्य रहेका तत्कालीन एमालेका ६ नेताको छुट्टै बैठक प्रधानमन्त्री निवास बालुवाटारमा बसेको थियो । बैठकमा जिम्मेवारी बाँडफाँड विषयमा गम्भीर छलफल गर्दै स्कुल विभागमा पोखरेलाई ल्याउने सहमति भएको थियो । तर, पार्टी प्रवक्तासमेत रहेका नेता श्रेष्ठले आफ्नो दाबेदारी कायम नै राखेपछि विवाद भएको हो ।
‘जनताको बहुदलीय जनवाद’ (जबज) विषयमा खुलेर वकालत गरेका पोखरेललाई स्कुल विभाग प्रमुख बनाउन नहुने तर्क तत्कालीन माओवादी नेताको छ । पार्टी एकता गर्दा जनताको जनवादमा सहमति भइसके पनि पछिल्लो समय पोखरेलले ‘जबज’ विषयमा सर्वजनिक रूपमै वकालत गरेका थिए ।
प्रधानमन्त्री निवास बालुवाटारमा आइतबार बसेको सचिवालय बैठकमा श्रेष्ठ र पोखरेलले स्कुल विभाग प्रमुख हुनुपर्ने दावी प्रस्तुत गरेको स्रोतको दाबी छ । दुबै नेताको अडानकै कारण सचिवालय बैठकले विभाग, आयोगलगायतका एकता कार्य टुंगो लगाउन नसकेको हो ।

जिल्ला इन्चार्ज र सहइन्चार्ज मात्रै टुंगो लगाउँदै पुनः आज मंगलबार बैठक बोलाइएको छ । तर, नेताबीच सहमति जुटाउन अझै गृहकार्य जारी रहेको
स्रोतले बतायो । नेकपाका ३२ विभागमा भागबण्डा सहमति यसअघि नै भइसकेको छ । ३२ विभागमध्ये तत्कालीन एमाले १८ र तत्कालीन माओवादीले १४ वटामा प्रमुखको जिम्मेवारी लिने सहमति भइसकेको छ ।
पार्टी प्रवक्ताका भूमिकामा रहेका श्रेष्ठलाई अध्यक्षद्वय ओली र दाहालले प्रचार विभाग प्रमुख बन्न आग्रह गरिसकेका छन् । तर, श्रेष्ठले ‘प्रचार विभाग नलिने’ अडान व्यक्त गर्दै ‘स्कुल विभाग प्रमुख बनाउनुपर्ने’ अडान लि“दै आएका छन् ।

प्रकाशित मिति : २०७६ साउन ७ गते मङ्गलवार
प्रतिक्रिया