कपुरकोटमा पहिरोले स्काभेटर पुर्‍यो, चालक घाइते

 सल्यान, २९ साउन ।   सल्यानको कपुरकोट गाउँपालिका–५ खारखोलामा पहिरो खस्दा सडक स्तरोन्नतिको काममा प्रयोग भइरहेको स्काभेटरमा क्षति पुगेको छ भने चालक घाइते भएका छन्। राप्ती राजमार्गअन्तर्गत सडक स्तरोन्नतिको काम भइरहेको क्रममा बिहान करिब ८ः५० बजे माथिबाट आएको गिलो लेदोसहितको पहिरोले भे.१–००३ क ७३२१ नम्बरको स्काभेटरको अगाडिको हाइड्रोलिक भाग पुरेको हो। पहिरोका कारण स्काभेटरको सिसा फुट्नुका साथै बोनट र ट्याङ्कीमा समेत क्षति पुगेको प्रहरीले जनाएको छ। स्काभेटर चालक जाजरकोट भेरीमालिका नगरपालिका–१० का २८ वर्षीय कर्णबहादुर कामीको कुममा सामान्य चोट लागेको छ।

थप उपचारका लागि तुलसीपुरतर्फ लैजाने तयारी गरिएको छ। प्रहरीका अनुसार चालकसँग सवारी चालक अनुमतिपत्र रहेको र मादक पदार्थ सेवन नगरेको पाइएको छ। पहिरोका कारण स्काभेटरमा क्षति पुगे पनि सडकमा यातायात भने अवरुद्ध भएको छैन। घटनापछि प्रहरी चौकी कपुरकोटबाट प्रहरी सहायक निरीक्षक हेमराज कार्कीको कमाण्डमा ट्राफिक प्रहरीसहित ६ जनाको टोली घटनास्थलमा खटिएको जिल्ला प्रहरी कार्यालय सल्यानले जनाएको छ। घटनास्थल कपुरकोट प्रहरी चौकीबाट करिब १० किलोमिटर उत्तरमा पर्छ।