रोल्पामा ट्रक दुर्घटना, एक जना घाइते

दाङ, ११ मंसीर । रोल्पामा ट्रक दुर्घटना हुँदा एकजना घाइते भएको प्रहरीले बताएको छ । घाइते हुनेमा त्रिवेणी गाउँपालिका–७ निवासी ५४ वर्षका केशर बिक रहेको जिल्ला प्रहरी कार्यालय रोल्पाका डिएसपी वीरेन्द्र बिकले जानकारी दिनुभयो ।

घाइते बिक ट्रकमा सवार रहेको प्रहरीले बताएको छ । नवलपरासीबाट सिमेन्ट लिएर गइरहेको रा १ क ३०५२ नम्बरको ट्रक रोल्पाको त्रिवेणी गाउँपालिका– २ भाङबारीमा दुर्घटना भएको थियो । ब्रेक फेल भएका कारण ट्रक दुर्घटना भएको प्रहरीले जनाएको छ । दुर्घटना दिउँसो सवा एक बजे भएको थियो ।