नेपाल मानव धर्म सेवा समितिले मनायो भानु जयन्ती

तुलसीपुर २९, अषाढ । नेपाल मानव धर्म सेवा समितिले आज आदिकवि भानुभक्त आचार्यको २११ औँ जन्मजयन्तीका अवसरमा कविता प्रतियोगिता कार्यक्रम गरी मनाएको छ । भानुभक्त आचार्यद्वारा नेपाली भाषामा अनुवाद गरिएको रामायणले विविध भूगोल, जातजाति, संस्कार र संस्कृति अँगालेका नेपालीबिच अपनत्वको भावना र साझा मनोविज्ञानको निर्माणमा महत्वपूर्ण योगदान पु¥याएको भन्दै उहाँको सम्झनामा कविता प्रतियोगिता सँगै सत्सँग कार्यक्रम गरिएको हो ।

सो अवसरमा नेपाल मानव धर्म सेवा समिति राप्ति भेरी क्षेत्र आश्रमका प्रचारिका महात्मा चन्द्रकान्त बाईजीले आदिकवि भानुभक्तले गर्नुभएको राम्रो कर्मलाई सबैले स्मरण गर्नु पर्ने बताउनुभएको थियो । आफुसँग जति नै धन, सम्पत्ति, शिक्षा, मान, सम्मान भए पनि समाजको भलाईको निमित्त केहि राम्रो कार्य गर्न सके त्यो स्मरण योग्य हुने भएकाले हामीमा सधैं निस्वार्थ भावना जागृत हुनु पर्ने बताउनुभएको थियो ।

कविता प्रतियोगिता कार्यक्रममा बालसभाका बालबालिकाहरुको सहभागिता रहेको थियो । जसमा शिशिर शर्मा प्रथम, रोहित पुनमगर द्वितिय, आरोही खनाल तृतीय हुनुभएको थियो । सो अवसरमा रेडियो प्रकृतिका स्टेशन म्यानेजर ओपेन्द्र बस्नेत, तुलसीपुर मेट्रो कलेज कानुन संकायमा अध्ययनरत विद्यार्थी तिलक रावत, सेवा दल तथा युथका दाङ जिल्ला संयोजक सुर्य थापा लगाएतले भानुभक्तको जस्तै सकरात्मक विचार हामी सबैमा आउन आवश्यक रहेको र यसका लागी आध्यात्मिक ज्ञानको जरुरी रहेको बताउनुभएको थियो । कार्यक्रमको सञ्चालन नेपाल मानव धर्म सेवा समिति शाखा तुलसीपुरका सचिव चन्द्र बहादुर वलीले गर्नुभएको थियो ।