डिल्ली मल्ल
सल्यान, जेठ ५ ।
सल्यानको कुमाखमालिका गाउँपालिकामा नेकपा (माओवादी केन्द्र) विजयी भएको छ । एमालेका भैरवबहादुर शाहलाई १ हजार ५ सय ४५ मतको फराकिलो अन्तरले पराजित गर्दै माओवादी केन्द्रका दिलमाया बुढामगर अध्यक्षमा विजयी बन्नुभएको हो । उहाँले ३ हजार ६ सय ७३ मत प्राप्त गर्नुभएको छ भने शाहले २ हजार १ सय २८ मत प्राप्त गर्नुभएको छ ।
कांग्रेसका अध्यक्षका उम्मेदवार विवेकसिंह राठौरले १ हजार ९ ३९ मत प्राप्त गर्नुभएको छ । त्यसैगरी राजमोका तिलकबहादुर रावतले ७० र राप्रपाका भरत बुढाथोकीले ५४ मत प्राप्त गर्नुभएको निर्वाचन अधिकृत निर्मला मल्लले जानकारी दिनुभयो । उपाध्यक्षमा माओवादी केन्द्रका डिल्लीराज जैशीले ३ हजार ८ सय १८ मत प्राप्त गरी विजयी हुनुभएको छ भने उहाँका निकटतम प्रतिद्वन्द्वी एमालेका शान्ति चन्दले २ हजार ७५ मत प्राप्त गर्नुभएको छ भने कांग्रेसका उर्मिला राना बुढाथोकीले १ हजार ८ सय ८३ मत प्राप्त गर्नुभएको छ । त्यस्तैगरी राजमोका उम्मेदवार प्रमिला खत्रीले ६२ मत र राप्रपाका सरिता बुढाथोकीले ५६ मत प्राप्त गर्नुभएको छ ।
