दाङ, ८ असोज । भारी देखि अति भारी वर्षाको सम्भावनालाई मध्येनजर गर्दै जिल्ला प्रशासन कार्यालय दाङले जिल्लाका पाँच प्रमुख सडकखण्डमा आज बेलुका ५ बजेदेखी सवारी आवागमन बन्द गर्ने जानकारी दिएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरण र नेपाल मौसम विज्ञान विभागको सूचनाका आधारमा आज विहीवार ८ गतेदेखि ११ गतेसम्म बर्षाको जोखिमलाई ध्यानमा राख्दै प्रत्येक दिन बेलुका ५ बजेदेखि बिहान ६ बजेसम्म सडक बन्द गरिने प्रमुख जिल्ला अधिकारी निश्चलराज पाण्डेले जारी गरेको सुचनामा उल्लेख छ।
बन्द हुने सडकखण्डमा राप्ती राजमार्ग अन्तर्गत तुलसीपुर–कपुरकोट, भालुवाङदेखि चकचकेसम्मको सडकखण्ड -भालुवाङ–गनाहा खोला), शहीद मार्ग अन्तर्गत घोराही–होलेरी, घोराही–मुर्कुटी र तुलसीपुर–सुर्खेत सडकखण्ड अन्तर्गत तुलसीपुरदेखि कालिमाटीसम्म रहेका छन्। कार्यालयले सम्भावित वर्षाका कारण हुनसक्ने जोखिम न्यूनीकरणका लागि उक्त निर्णय गरिएको जारी सुचनामा भनिएको छ। प्रशासनले सम्बन्धित सबैलाई सूचना पालना गर्न आग्रह गरेको छ। आकस्मिक अवस्थाका लागि जिल्ला प्रशासन कार्यालय, जिल्ला प्रहरी कार्यालय तथा जिल्ला आपत्कालीन कार्य सञ्चालन केन्द्रसँग सम्पर्क गर्न सकिने जनाइएको छ।
टिप्पणी तथा प्रतिक्रिया
यस समाचारबारे आफ्नो विचार तथा प्रतिक्रिया राख्नुहोस्।