दाङमा चुनावको माहोल बढ्दै , टिकटका लागि को को छन आकांक्षीहरू ( नाम सहित )

चैत्र १६ तुलसीपुर ।

स्थानीय तहको निर्वाचनको समय नजिकिँदै गर्दा दाङमा चुनावको माहोल बढ्दै गएको छ । निर्वाचनको मिति घोषणासँगै विभिन्न राजनीतिक दलका नेता तथा कार्यकर्ताहरू चुनावी छलफल र बहसमा केन्द्रित हुन थालेका छन् ।

करिब १८ वर्षदेखि स्थानीय निकाय जनप्रतिधिहीन हुँदाको अवस्थामा आगामी ३१ वैशाखमा राज्य पुनःसंरचनाअनुसार स्थानीय तहको निर्वाचन हुने भएकाले पनि सबैको ध्यान आगामी चुनावले तान्न सफल भएको छ । चुनावको चर्चासँगै स्थानीय तहका विभिन्न पदहरूका आकांक्षीहरूका पनि चर्चा चुलिँदै गएको छ भने उम्मेदवारका आकांक्षीहरू टिकट हात पार्न प्रभावशाली नेताको घरसम्मको दौडमा सामेल भइरहेका छन् । आकांक्षीहरूका दौडका कारण प्रभावशाली स्थानीयलगायत अन्य नेताहरूको घरमा चहलपहल बढ्दै गएको छ ।

राज्य पुनःसंरचनाअनुसार जिल्लामा कायम भएको दुई उपमहानगरपलिका, एक नगरपालिका र ७ गाउँपालिका गरी १० स्थानीय तह कायम भएका छन् । तीमध्ये जिल्लाको दुर्गममा रहेका राप्ती गाउँपालिका र बंगलाचुली गाउँपालिकामा कुनै पनि दलको तर्फबाट सम्भावित उम्मेदवारको चर्चा हुन सकेको छैन । सुगम ठाउँका स्थानीय तहहरू मात्र चुनावी चर्चामा रहेको राजनीतिक दलका नेताहरूले स्वीकार गरेका छन् ।

मतदान हुने दिन आउन करिब दुई महिना अगावै सम्भावित उम्मेदवारका नेताहरूको सकारात्मक र नकारात्मक पक्षका समीक्षा र टिकाटिप्पणी हुन थालेको छ । नेता, कार्यकर्ता र शुभचिन्तकहरूले अहिलेदेखि नै आफू निकटका नेताहरूको नाम उम्मेदवारका रूपमा चर्चामा ल्याएको गुनासो पनि आउन थालेको छ ।

वर्तमान अवस्थामा कांग्रेस र एमालेबीच नै प्रतिस्पर्धा हुने आँकलन स्थानीयले गरेका छन् । २०५४ मा सम्पन्न स्थानीय निकायको चुनावमा दाङमा एमालेले अधिकांश ठाउँमा कब्जा गरेको थियो । यसपटक हुने स्थानीय तहको निर्वाचनमा पनि जिल्लामा पहिलो पार्टी हुने लक्ष्य लिएको एमाले दाङका अध्यक्ष टीकाराम खड्काले बताए । संविधान जारी, सामाजिक सुरक्षा भत्तालगायतका लोकप्रिय कार्यक्रम आदिका कारण पनि एमालेको बलियो ताबेदारी रहेको उनले बताए । साथै दाङका तुलसीपुर र घोराही नगरापालिकालाई उपमहानगरपालिका बनाउन एमालेको भूमिका मुख्य रहेको उनको दाबी छ ।