नेपालमा थप ३ जनाको मृत्यु, कोरोनाकै कारण मृत्यु हुनेको संख्या ४८ पुग्यो

काठमाडौ, १२ साउन ।
नेपालमा पछिल्लो २४ घन्टामा थप तीन जनाको कोरोना सङ्क्रमणका मृत्यु भएको छ । स्वास्थ्य तथा जनसंख्या मन्त्रालयले नियमित कोभिड–१९ सम्बन्धी जानकारी दिने क्रममा पछिल्लो २४ घन्टामा तीन जनाको कोरोना सङ्क्रमणका कारण मृत्यु भएको जानकारी दिएको हो । मन्त्रालयका प्रवक्ता डा. जागेश्वर गौतमका अनुसार बाराको फेटा गाउँपालिका वडा नम्बर ३ का ६० वर्षका पुरुषको सोमवार बिहान उपचारको क्रममा त्रिवि शिक्षण अस्पतालमा मृत्यु भएको हो ।

कोरोना सङ्क्रमित ती पुरुषमा मस्तिष्कघात, निमोनिया र मिर्गौलाका पीडित रहेको उनले बताए । यस्तै आईतवार पर्साका एक जना ६५ वर्षका भारतीय नागरिकको गण्डक अस्थायी अस्पतालमा उपचारको क्रममा मृत्यु भएको छ भने सोहि दिन धनुषाको शहिदनगर नगरपालिका ८ का ३६ वर्षका एक जना पुरुषको पनि कोरोना सङ्क्रमणका कारण मृत्यु भएको प्रवक्ता डा गौतमले बताए । कोरोना सङ्क्रमित ती व्यक्तिलाई स्वास्थ्यमा समस्या भएपछि थप उपचारका लागि धरान लैजाने क्रममा बाटोमै मृत्यु भएको डा. गौतमले बताए ।

योसँगै प्रदेश नम्बर २ मा मात्रै कोरोना सङ्क्रमणका कारण मृत्यु हुनेको संख्या १२ पुगेको छ भने नेपालमा मृत्यु हुनेको संख्या ४८ पुगेको छ । यस्तै पछिल्लो २४ घन्टामा १ सय ३९ जना नयाँ कोरोना सङ्क्रमित थपिएका छन् । डा. गौतमले विभिन्न २७ वटा प्रयोगशालामा गरिएको परीक्षणमा १ सय ३९ जनामा कोरोना सङ्क्रमण पुष्टि भएको भन्दै नेपालमा कोरोना सङ्क्रमितको संख्या १८ हजार ७ सय ५२ पुगेको बताए । यस्तै पछिल्लो २४ घन्टामा ६ सय २३ जना कोरोना सङ्क्रमित स्वस्थ भएको भन्दै उहाँले नेपालमा हालसम्म कोरोना सङ्क्रमणपछि निको हुनेको संख्या १३ हजार ७ सय ५४ पुगेको जानकारी दिए । हालसम्म नेपालका ६ जिल्ला कोरोना सङ्क्रमण मुक्त भएका छन् ।

प्रकाशित मिति : २०७७ साउन १२ गते सोमवार
प्रतिक्रिया