जापान पठाउने भ्रमपुर्ण प्रचारमा नपर्न सरकारको आग्रह

दाङ, १० साउन ।

श्रम रोजगार तथा सामाजिक सुरक्षा मन्त्रालयले जापान पठाइदिने भन्दै भ्रमपूर्ण प्रचार गर्नेहरु प्रति विश्वास नगर्न आग्रह गरेको छ ।नेपाल सरकार र जापान सरकारबीच भएको स्पेसिफाइड स्कील्ड वर्कर (एसएसडब्लु) प्रणाली अन्तर्गत जापान रोजगारीमा पठाइदिने भनेर केही जापानी भाषा प्रशिक्षण केन्द्र लगायत सीप प्रशिक्षण केन्द्रहरुले भ्रमपूर्ण प्रचार गरिरहेको भन्दै त्यस्ताको विश्वास नगर्न मन्त्रालयले आग्रह गरेको हो ।

जापानमा रोजगारी प्राप्त गर्न जापानिज भाषा परीक्षा उत्तीर्ण गरेको र सम्बन्धित कार्यक्षेत्रको सीप परीक्षण प्रमाणपत्र प्राप्त गरेको हुनुपर्ने प्रावधान रहेको छ । त्यस अनुरुप दुवै परीक्षणहरु जापान सरकारकै तर्फबाट छनौट भएको जापान फाउण्डेसनले मात्र गरिरहेको मन्त्रालयले जनाएको छ ।यसै प्रावधान अन्तर्गत जापानका रोजगारदाताहरु मार्फत नेपालबाट अहिले केयर गिभरको लागि केही मागहरु प्राप्त भएको छ । यसरी एसएसडब्लु प्रणाली अन्तर्गत जापान फाउण्डेशनले सञ्चालन गरेको भाषा र सीप परीक्षामा सहभागी भई उत्तीर्ण भएका उम्मेदवारहरु मात्र योग्य उम्मेदवार मानिने भएकाले भाषा केन्द्रहरुको भ्रममा नपर्न मन्त्रालयले सचेत गराएको छ ।

 

प्रकाशित मिति : २०७७ साउन १० गते शनिवार
प्रतिक्रिया