सरकारकाे अनुमतिबिना मेयर विदेश भ्रमण

काठमाडौं।  काठमाडौं  महानगरपालिकाका प्रमुख विद्यासुन्दर शाक्य सरकारको अनुमतिबिना नै जम्बो टोली लिएर चीन भ्रमणमा गएका छन्  राजधानी दैनिकले खबर छापेकाे छ ।  । उच्च स्रोतले दिएको जानकारीअनुसार शाक्यसहित १० जनाको टोली अनुमति नै नलिई विदेश भ्रमणमा गएको हो ।
आइतबार १० जनाको भ्रमण टोलीसहित शाक्य चीनको ल्हासा र छेन्दु सहरको भ्रमणमा गएका हुन् । महानगरपालिकाका अनुसार उनीहरू नौदिने भ्रमणका लागि चीन गएका हुन् । भ्रमण टोलीमा नगरप्रमुख शाक्यकी धर्मपत्नी सुचिता शाक्य, वडा नम्बर १ का वडाध्यक्ष भरतलाल श्रेष्ठ, वडा नम्बर २८ का वडाध्यक्ष भाइराम खड्गी, नगरकार्यपालिका सदस्य रश्मि खड्का र हिरा पोखरेल, प्रशासन महाशाखाका निर्देशक गणेश थपलिया र अन्तर्राष्ट्रिय सम्बन्ध सचिवालयका शाखा अधिकृत यम बस्याल, ललितकला प्रज्ञा प्रतिष्ठानका तर्फबाट धर्म शाक्य र सुष्मा राजभण्डारी रहेका छन् ।

कानुनतः जनप्रतिनिधिले विदेश भ्रमणमा जाँदा मन्त्रिपरिषद्बाट निर्णय गराएर मात्र भ्रमणमा जानुपर्नेहुन्छ । तर, नगरप्रमुख शाक्यसहितको नगरपालिकाको जम्बो टोलीले सो कानुनी व्यवस्थाको खिल्ली उडाएका छन् । महानगरपालिकाले भने अनुमति लिएर नै भ्रमणमा गएको दाबी गरेको छ । महानगरका प्रवक्ता ईश्वरमान डंगोल नगरप्रमुखसहितको टोलीे ल्हासा सहरको निमन्त्रणालाई स्वीकार्दै त्यसतर्फ गएको बताए ।
डंगोलले भने, ‘वर्षौंदेखि भगिनी सम्बन्ध स्थापित भएको चीनको ल्हासा र छेन्दु सहरको निमन्त्रणमा प्रमुखसहितको महानगरको टोली भ्रमणमा गएको हो । उनले प्रमुख शाक्य सरकारको अनुमति लिएर विदेश गएको दाबी गरे तर प्रधानमन्त्री तथा मन्त्रिपरिषद् कार्यालय स्रोतका अनुसार मंगलबारसम्म शाक्यको भ्रमणसम्बन्धी कुनै निर्णय भएको छैन ।
महानगरमा फोहोर व्यवस्थापन तथा सिस्डोलको समस्या लगाायतका यावत् समस्यालाई थाती राख्दै प्रमुख शाक्य चीन भ्रमणमा गएपछि उनको आलोचना हुन थालेको छ । स्रोतका अनुसार चीनबाट फर्केलगत्तै उनी फिनल्यान्ड जाने तयारीमा रहेका छन् । यसका लागि समेत स्वीकृति नै नलिई भ्रमणको कार्यक्रम तय गरिएको छ ।

कार्की सम्पर्कविहीन

महानगरका प्रशासन विभाग प्रमुख ज्ञानेन्द्र कार्की सामान्य प्रशासन मन्त्रालय काज सरुवा भए पनि उनी सम्पर्कविहीन भएका छन् । विगत केही दिनदेखि उनी महानगरपालिका तथा सामान्य प्रशासन मन्त्रालयको सम्पर्कमा नआएकोे बताइएको छ ।
मन्त्रालयले अर्को व्यवस्था नभएसम्मका लागि भन्दै गत ३१ असारमा कार्कीलाई महानगरबाट मन्त्रालयमा बोलाएको थियो । तर, त्यसपछि उनी सम्पर्कविहीन भएको महानगरपालिका स्रोतले जानकारी दिएको छ ।

प्रकाशित मिति : २०७६ साउन १५ गते बुधवार
प्रतिक्रिया