काठमाडौं, २२ भदौ । चीनको दक्षिणमा रहेको हाइनान एक दशकयताकै शक्तिशाली आँधीबाट प्रभावित भएको छ । बेगसहितको हावा र मुसलधारे पानीले जनजीवन प्रभावित बनाएको छ । चीनको मौसम विभागले शरद ऋतुमा आएको यो सबैभन्दा शक्तिशाली आँधी भएको जनाएको बीबीसीले उल्लेख गरेको छ ।
सुपर टाइफुन ‘यागी’ हिजो स्थानीय समय अनुसार ४ बजे दुई सय २३ किलोमिटर प्रतिघण्टाको दरमा वेनचाङ शहरमा प्रवेश गरेको थियो । यो आँधी आउनुअगावै हाइनान टापुका झण्डै चार लाख मानिसलाई सुरक्षित ठाउँमा सारिएको थियो । रेल, डुङ्गा र उडान निलम्बित गरिएको थियो । स्कूलहरू पनि बन्द रहेका थिए । हाइनान चीनको दक्षिणमा रहेको एक लोकप्रिय पर्यटक टापु पनि हो ।।
प्रकाशित मिति : २०८१ भाद्र २२ गते शनिवार
