दाङ, १४ असार ।
दाङ जिल्लामा परेको वर्षाका कारण राप्ती गाउँपालिकाको अधिकांश मतदान केन्द्रमा निर्वाचन कार्यक्रम प्रभावित भएका छन् । दाङ जिल्लाको देउखुरी उपत्यकामा वर्षा भएको स्थानीयले बताएका छन् । राप्ती गाउँपालिकाको वडा नं. २ लालमटियाको मतदान केन्द्रमा मतदान स्थल पानीले भरिएको छ । पानीले भरिएपछि मतदाता र कर्मचारीलाई काम गर्न समस्या परेको हो ।
यस्तै देउखुरीको लमहीमा पानी परेर मतदान प्रभावित भएको छ । लमही नगरपालिका ६ दुमदुमा केन्द्रमा विद्यालयको कोठाभित्र मतदानको व्यवस्था मिलाइएको छ ।बाहिर चौरमा मतदानको तयारी गरिए पनि पानी परेर सम्भव नभएपछि मतपेटिका सहितका निर्वाचन सामाग्री कोठाभित्र राखिएको छ । कर्मचारीहरु पनि विद्यालयको कोठाभित्र बसेका छन् ।
बाहिर चौरमा मतदाताहरु रुझ्दै लाइनमा बसेका छन् । कतिपयले छाता ओढे पनि ठूलो पानी परिरहेकाले समस्या परेको गुनासो गरेका छन् । छाता ओढेर मतदानका लागि पालो कुरिरहेका मतदातासमक्ष उम्मेदवारहरु भने पानीमा रुझ्दै मत मागिरहेका छन् ।
