काठमाडौं, १७ कात्तिक । नेपाली कांग्रेसका सभापति शेरबहादुर देउवाले वर्तमान सरकारले राम्रो काम गरिरहेको बताउनुभएको छ । नेपाली कांग्रेस जिल्ला कार्यसमिति भक्तपुरले आयोजना गरेको शुभकामना आदानप्रदान तथा जय नेपाल भक्तपुर स्मारिका लोकार्पण कार्यक्रममा उहाँले वर्तमान सरकारले राम्रो काम गरिरहेकाले सरकारलाई पार्टीको तर्फबाट कुनै किसिमको अवरोध नहुने बताउनुभयो । प्रधानमन्त्री ओलीले राम्रो काम गरिरहेको र आगामी दिनमा पनि यस्तै राम्रो काम गर्दै जाने विश्वास आफुले लिएको सभापति देउवाले बताउनुभयो । प्रधानमन्त्री ओलीलाई आफूले पनि सल्लाह, सुझाब दिएर सहयोग गरिरहेको भन्दै उहाँले सरकारका सामुन्ने आइपर्ने समस्या समाधानका लागि आफ्नो तर्फबाट पुरापूर सहयोग रहने प्रतिवद्धता जनाउनुभयो ।
जुनसुकै देशमा पनि विपक्षी दलले सरकारको आलोचना गर्नु स्वभाविक भएको भन्दै सभापति देउवाले आलोचनालाई खराब नमानेको र त्यसलाई तथ्यपरक ढङ्गले सरकारले ध्यान दिने बताउनुभयो । एमालेसँग संयुक्त सरकार बनेपछि पार्टी पंक्ति पनि खुसी रहेको बताउँदै उनले वर्तमान सरकारलाई सफल बनाउन कांग्रेस लाग्ने र सहमतिअनुसार नै सरकार सञ्चालन हुने उल्लेख गर्नुभयो । कार्यक्रममा कांग्रेस नेता एवम् संस्कृति, पर्यटन तथा नागरिक उड्डयन मन्त्री बद्री पाण्डेले कांग्रसले अहिले एमालेसँग सहकार्य र प्रतिस्पर्धा दुवै गरिरहेको बताउनुभयो ।।
