दाङ, १८ जेठ ।पाल्पाको रम्भा गाउँपालिका वडा नम्बर ४ हुमिन आज भएको बस दुर्घटनामा परि संख्या १३ जनाको ज्यान गएको छ भने अन्य १० जना घाईते भएका छन् । जिल्ला प्रहरी कार्यालय पाल्पाका अनुसार ज्यान जानेमा विष्णुमान बज्राचार्य, उहाँका भाई सचिन बज्राचार्य, कृष्णमान शाक्य, क्षेत्रमान शाक्य, गीता बुढाथोकी, कमला कार्की, लोकप्रसाद ढकाल, दुर्गाबहादुर सारु, सुशील श्रेष्ठ, देवेन्द्र प्रधान, वसन्ती खाँड, दुर्गा श्रेष्ठ र कृष्ण्णबहादुर बोहरा रहेका छन् ।
मृतक सवै जना तानसेन निवासी भएको प्रहरीले जनाएको छ । सचिन बज्राचार्य र कमला कार्कीको उपचारका क्रममा अस्पतालमा ज्यान गएको हो । घाईतेहरुको युनाइटेड मिसन अस्पताल तानसेन र २ जनाको लुम्बिनी मेडिकल कलेज प्रभासमा उपचार भैरहेको प्रहरीले जनाएको छ ।सदरमुकाम तानसेनबाट रामपुर भ्रमणका लागि जाँदै गरेको लक्ष्मी बचत तथा ऋण सहकारी संस्था तानसेनका सदस्यहरु सवार लु २ ख ९७५ नम्बरको बस दुर्घटनामा परेको हो । दुर्घटना आज विहान सवा ९ वजेतिर भएको हो । पानी परेका कारण बाटो चिप्लो भएर गाडी दुर्घटना भएको हुन सक्ने प्रहरीले प्रारम्भिक अनुमान गरेको छ ।
