तुलसीपुर, २० श्रावन । दाङमा टिप्परको ठक्करबाट मोटरसाइकल चालकको मृत्यु भएको छ । मृत्यु हुनेमा जिल्लाको घोराही उप–महानगरपालिका–१५ का ३९ वर्षीय कुल बहादुर बस्नेत रहेको जिल्ला प्रहरी कार्यालय दाङका प्रवक्ता तथा डीएसपी राम प्रसाद तिमल्सिनाले जानकारी दिनुभयो । उहाँका अनुसार घोराहीबाट तुलसीपुरतर्फ आउदै गरेको लु २ ख ५०८५ नम्बरको टिप्परले नारायणपुरबाट घोराहीतर्फ जादै गरेको बा ५८ प ५६०५ नम्बरको मोटसाइललाई गएराती सवा ८ बजेको समयमा घोराही–१० अम्राही नजिकै ठक्कर दिदा दुर्घटना भएको हो ।
दुर्घटनामा परी गम्भिर घाइते भएका मोटरसाइकल चालक बस्नेतलाई राप्ती स्वास्थ्य विज्ञान प्रतिष्ठान घोराही पुर्याएलगत्तै पौने ९ बजेको समयमा मृत्यु भएको डीएसपी तिमल्सिनाले बताउनुभयो । ठक्कर दिने टिप्परसहित चालक पश्चिम नवलपरासीको सुनवल नगरपालिका–१० को गैराखाल बस्ने शिव बहादुर क्षेत्रीलाई नियन्त्रणमा लिएर घटनाबारे अनुसन्धान भइरहेको प्रहरीले जनाएको छ ।।
