तुलसीपुर १५ चैत्र
गन्तव्यमा हिडेका यात्रुलाई जबरजस्ती तानेर आफनो सवारी साधनमा बसाउने गरेको गुनासो आएपछि ईलाका प्रहरी कार्यालय तुलसीपुरले निगरानी बढाउन थालेको छ । सवारी चालक र सह चालकले यात्रुलाई आफनो गाडीमा चढाउन यात्रुलाई तानातान गर्ने गरेपछि निगरानी बढाईएको हो । प्रहरीले बुधबार र बिहिबार यात्रु तानातान गर्ने ४ जनालाई नियन्त्रणमा लिएको छ । तुलसीपुर घोराही सडक खण्डमा यात्रुलाई तानातान गरेको आरोपमा बुधबार पक्राउ परेका पुरन जिसी र अर्जुन चौधरीलाई एक रात हिरासतमा राखेर आज छोडेको प्रहरी नायब उपरीक्षक प्रकाश सापकोटाले जानकारी दिएका छन् ।
यसैगरी बिहीबार पनि यात्रु तान्ने दुई जनालाई प्रहरीले पक्राउ गरेको छ । पक्राउ पर्नेमा सरद पुन र महेश भण्डारी रहेको प्रहरीले बताएको छ । यी दुबै जना भने अहिले प्रहरी हिरासतमा छन् । यात्रु वाहक बस र हाईसमा चढ्ने यात्रुहरुलाई तानातान गरि अलपत्र पार्ने, यात्रुहरुको सामान अलपत्र पार्ने कार्य विरुद्ध प्रहरीले आफ्ना गतिविधिलाई तिब्र पार्ने बताएको छ ।
